द्विरदवदन विषमरद वरद जयेशान शांतवरसदन ।
सदनवसादन दयया कुरु सादनमंतरायस्य ॥ 1 ॥
इंदुकला कलितालिक सालिकशुंभत्कपोलपालियुग ।
विकटस्फुटकटधाराधारोऽस्यस्य प्रपंचस्य ॥ 2 ॥
वरपरशुपाशपाणे पणितपणायापणायितोऽसि यतः ।
आरूह्य वज्रदंतं आखुं विदधासि विपदंतम् ॥ 3 ॥
लंबोदर दूर्वासन शयधृतसामोदमोदकाशनक ।
शनकैरवलोकय मां यमांतरायापहारिचारुदृशा ॥ 4 ॥
आनंदतुंदिलाखिलवृंदारकवृंदवंदितांघ्रियुग ।
सुखधृतदंडरसालो नागजभालोऽतिभासि विभो ॥ 5 ॥
अगणेयगुणेशात्मज चिंतकचिंतामणे गणेशान ।
स्वचरणशरणं करुणावरुणालय देव पाहि मां दीनम् ॥ 6 ॥
रुचिरवचोऽमृतरावोन्नीता नीता दिवं स्तुतिः स्फीता ।
इति षट्पदी मदीया गणपतिपादांबुजे विशतु ॥ 7 ॥
